मस्त मूव्ही आहे . मला पण माहित नव्हते या आधी कोण प्रवीण तांबे?
अर्थात माझी क्रिकेटची आवड यथातथा असल्याचा हा परिणाम असावा. माझ्यासारखी अनेकजन या भूतलावर असण्याची मला खात्री आहे. पण क्रिकेटच्या काही घटना माझ्या जीवनात महत्वाच्या व लक्षात राहण्याजोग्या ठरल्या आहेत. त्यासंदर्भात नंतर कधीतरी यथावकाश. पण एक आहे कि जरी त्या घटना थेट मैदान वा पीचशी रिलेटेड नसल्या तरी क्रिकेटशी संदर्भात आहेत हे नक्की. अनेक छोट्या घटना आपले आयुष्य समृद्ध करत असतात. कोण कोणाला कधी प्रेरणा देऊन जाईल सांगता येत नाही.
अर्थात आताचा विषय, कौन प्रवीण तांबे?
Pravin tambe proves that age is just a number...
पण तरी तो कोण?
वयाच्या ४१ पर्यंत रणजी खेळण्याचे स्वप्न बघत तितकं संपूर्ण आयुष्य पणाला लावणारा ध्येयवेड्या क्रिकेटरची गोष्ट ... जो फायनली आयपीएल साठी निवडला जातो, रणजी खेळतो. २०१४ च्या आयपीएलचं सीजन त्याने असं काही गाजवलं, की क्रिकेट विश्वातल्या प्रत्येकाला प्रविण तांबेची दखल घ्यावी लागली. या सीजनमध्ये तो राजस्थानसाठी सर्वाधिक विकेट घेणारा गोलंदाज ठरला. आधीच सर्वात वयस्कर(40) आयपीएल पदार्पण करण्याचा विक्रम नावावर झालेल्या प्रविण तांबेने हॅट्ट्रिक घेतली आणि सर्वांच्या भुवया उंचावल्या. याच कामगिरीच्या बळावर राजस्थान रॉयल्सने फायनलमध्ये धडक मारली. यानंतर अ श्रेणी क्रिकेटमध्ये त्याने विजय हजारे ट्रॉफीतही मुंबईचं प्रतिनिधित्व केलं.
पण हा प्रवास अत्यंत खडतर आहे.... होता.. ...
जर अस नसत झालं तर... ?
चित्रपट पाहून झाल्यावर जरी असा विचार मनात आला, खरच राहुल द्रविडचा आयपीएल साठी आमंत्रणाचा फोन तांबेसाठी आला नसता...?जर त्याला खेळायला भेटलच नसत...? किंवा तोच जीवनाच्या संघर्षात हरला असता तर...?
तरी चित्रपट पाहणाऱ्याला तो विचार निराशेच्या प्रचंड मोठ्या खाईत ढकलून देईल. तेथून पाहणाऱ्याला बाहेर निघणे अवघड होईल. प्रवीण तांबे तर संपलेला असेल. सुदैवाने असे झाले नाही आणि म्हणून कदाचित प्रवीण तांबेच्या जीवनातील हि नाट्यमयताच चित्रपटाचा विषय ठरली. संपूर्ण अडीच तासाच्या चित्रपटात तुम्ही आम्ही सर्व जन आपापली अपयशाची संघर्षाची जिद्दीची स्टोरी बघत असतो. शेवटच्या वीस मिनिटात प्रवीण तांबे सेलेब्रिटी बनतो. अर्थात त्यासाठी संपूर्ण चाळीस वर्ष एकच ध्यास असतो क्रिकेट..... तो काही झाल तरी, कुठेही नोकरीला लागला तरी, कुठेही वावरत असला तरी त्याच रणजी खेळण्याचे स्वप्न विसरत नाही.... अत्यंत प्रामाणिक पणे तो समोरच्याला विचारात असतो.. सर मेरा वो रणजी...मेरा क्रिकेट... संपूर्ण प्रवासात कुठेही आक्रस्ताळेपणा नाही. ना समोरच्यावर आरोप. प्रवीण तांबे व सामान्य माणसात फरक असतो इथे.... काहीही झाले तरी स्वप्न न विसरण्यात. ध्येयाशी प्रामाणिक राहण्यात.
लाईफ हो या क्रिकेट ... You need just a good over.. हे ऐकायला चांगलं वाटतं ... तांबेचे चाळीस वर्ष आहुती होती...
श्रेयस तळपदे अशा भूमिका जगतो. काही वर्षांपूर्वी आलेल्या इक्बाल मध्ये त्याने अशाच एका passionate क्रिकेटरची भूमिका दमदार पणे केली होती. मी तो चित्रपट पाहिला होता 2008 मध्ये जेव्हा मी अभ्यास करत होतो. वरती म्हटल्याप्रमाणे क्रिकेटच्या या विषयावरील चित्रपटाने अनेक दिवस मी प्रभावित होतो.
24 नोव्हेंबर 2007 च्या रात्री एक वाजेनंतर चित्रपट पाहून झाल्यावर ज्या ओळी मी कागदावर खरडल्या.... त्या अशा होत्या (अर्थात जपून ठेवलेल्या आज प्रवीण तांबे मुळे शोधून काढल्या.... त्या अशा )
अब मुश्किल नही कूच भी ... आशाए...आशाए...
इक्बाल पाहत आहे.
मेहनत करतांना – घरातूनच, जवळच्या माणसांकडून झालेला विरोध सहन करावा लागतो.
यश असच मिळवाव लागत तेव्हा झळाळून निघत. वाटतय मेहनत घेतच राहावी.
इक्बाल – एक स्टोरी आहे सगळ्यांची.
घरातला विरोध. खेळाच्या सिलेक्शन कमिटीतील भार्ष्टाचार, घर व बाजूचे सामाजिक आर्थिक वातावरण.
सिलेक्शन न झालेल्या वाया गेलेल्या अव्वल गोलंदाजाचे वाया गेलेले जीवन जो इक्बालला ट्रेन करून रणजी (आंध्र) मध्ये जागा मिळवून देतो व पुढे इंडिअन टीम मध्ये प्रवेश मिळावा म्हणून आपल्यालाच टाळणार्या गुरूला गो टू हेल म्हणतो.
या साऱ्या पार्श्वभूमीवर तळपून उठते इक्बालची जिद्द.
एक अश्रू विजयाच्या यशाच्या नावाने
डोळ्यातून ओघळतो.
तेव्हा पार जग विरघळून जाते.
अंधुकस अस्पष्टस दिसतं.
सार आकाश.
तोच क्षण असतो
यशाचा.
तोच क्षण असतो
सार जीवन आससून
जगण्याचा.
......असो,
ते तेव्हा लिहील. हे आज लिहितोय...
ती इक्बालची स्टोरी होती. हि तांबे ची स्टोरी आहे.
प्रत्येक पिढीत असे कोणीतरी जन्माला येणे आवश्यक असते.
प्रवीण तांबेला श्रेयस ने न्याय दिला कि श्रेयस ने प्रवीण तांबेला .... both knows.
सर्वच जण तेंडुलकर, गावसकर बनत नाहीत...काही जण प्रवीण तांबे बनतात.
- समाधान महाजन